नांदेड Ganesh festival news : कोरोनाच्या पार्श्वभूमीवर उद्भवलेल्या परिस्थितीचा विचार करुन याही वर्षी गणेशोत्सव साध्या पद्धतीने साजरा करण्याबाबतचे निर्देश राज्य शासनाने दिले आहेत. या मार्गदर्शक तत्वानुसार नांदेड जिल्ह्यातील सर्व गणेश मंडळांना कोरोना लसीकरण शिबीर, मलेरीया, डेंग्यू आदी साथीच्या आजारांबाबत जनजागृती सारखे उपक्रम राबविण्यासाठी पुढाकार घ्यावा, असे आवाहन जिल्हाधिकारी डॉ. विपीन इटनकर यांनी केले. (Ganesh Mandals should take initiative for corona vaccination: Collector)
गणेशोत्सवासंदर्भात गुरुवारी त्यांच्या अध्यक्षतेखाली जिल्हाधिकारी कार्यालयात शांतता समितीची बैठक झाली. या बैठकीत आमदार राजेश पवार (MLA Rajesh pawar) , निवासी उपजिल्हाधिकारी प्रदिप कुलकर्णी (RDC pradeep kulkarni), अप्पर पोलीस अधिक्षक निलेश मोरे (Additional Superintendent of Police Nilesh more) , उपविभागीय अधिकारी माने, तहसिलदार किरण अंबेकर, नायब तहसिलदार राजेश लांडगे आदी उपस्थित होते. (Ganesh Mandals should take initiative for corona vaccination: Collector)
जिल्ह्यातील सर्व तालुकापातळीवर आणि नांदेड महानगरपालिका क्षेत्रासाठी लसीकरण आयोजित करण्यासाठी संबंधित यंत्रणांना या बैठकीत निर्देश देण्यात आले. यात नांदेड महानगरपालिका क्षेत्रासाठी मनपा आरोग्य विभाग, संबंधित विभागातील पोलीस निरीक्षक, महानगरपालिका इतर विभाग यांच्या मार्फत सर्व गणेश मंडळांच्या यादीनुसार मोठ्या गणेश मंडळाने 18 वर्षावरील किमान 1 हजार 100 नागरीकांच्या लसीकरणासाठी पुढाकार घेण्याची जबाबदारी देण्यात आली आहे. यासाठी आवश्यक ते सहकार्य मनपा करेल.
नगरपालिका क्षेत्रात संबंधित उपजिल्हा रुग्णालय, ग्रामीण रुग्णालय, नगरपरिषद मुख्याधिकारी, संबंधित पोलीस निरीक्षक हे त्यांच्या कार्यक्षेत्रात गणेश मंडळांना लसीरकण शिबिरासाठी मदत करतील. ग्रामीण क्षेत्रासाठी संबंधित तहसिलदार, गटविकास अधिकारी, तालुका आरोग्य अधिकारी, तलाठी, ग्रामसेवक, प्राथमिक आरोग्य केंद्र, उपकेंद्र येथील वैद्यकिय अधिकारी, पोलीस पाटील यांच्यामार्फत गणेश मंडळांना लसीकरण शिबिरासाठी योग्य ते सहाय्य केले जाईल. जिल्हा आरोग्य अधिकारी हे लस उपलब्धतेबाबत मागणी प्रमाणे नियोजन करतील. तर मनपा उपायुक्त, जिल्हा प्रशासन अधिकारी (नगरपालिका प्रशासन) व उपमुख्य कार्यकारी अधिकारी (पंचायत) यांच्यामार्फत लसीकरण शिबिराचा आढावा व त्यासाठी आवश्यक ते सहकार्य करण्याची जबाबदारी सोपविण्यात आली असल्याचे जिल्हाधिकारी डॉ. विपीन इटनकर यांनी स्पष्ट केले.
