pune ring road news 2023 | पुणे रिंगरोडसाठी निधी तात्काळ उपलब्ध करुन देणार : अजित पवार
pune ring road news 2023 : महाराष्ट्र राज्य रस्ते विकास महामंडळाकडून (एमएसआरडीसी) प्रस्तावित असलेल्या रिंगरोडसाठी (वर्तुळाकार रस्ता) जिल्हा प्रशासनाकडून भूसंपादन केले जात आहे. पश्चिम मार्गाचे भूसंपादन मार्गी लागले असून, आता पूर्व मार्गाचे भूसंपादन सुरू केले जाणार आहे. त्यासाठी जिल्हा प्रशासनाने राज्य शासनाकडे निधीची मागणी केली आहे. त्यानुसार या रस्त्याच्या भूसंपादनासाठी लागणारा निधी तात्काळ उपलब्ध करून दिला जाईल, अशी ग्वाही राज्याचे उपमुख्यमंत्री आणि जिल्ह्याचे पालकमंत्री अजित पवार यांनी बुधवारी दिली. त्यामुळे आता पूर्व मार्गाचे भूसंपादनही सुरू होणार आहे. (Funds for Pune Ring Road will be made available immediately: Ajit Pawar)
मंत्रालयात उपमुख्यमंत्र्यांच्या प्रकल्प संनियंत्रण कक्षाच्या (प्रोजेक्ट मॉनिटरिंग युनिटच्या) बैठकीत उपमुख्यमंत्री पवार बोलत होते.
Related Posts
रिंगरोड प्रकल्पातील पश्चिम मार्गातील 205 हेक्टर जमीन प्रत्यक्ष ताब्यात आली आहे. या मार्गावरील अद्याप 411 हेक्टर जमीन ताब्यात आलेली नाही. या जमिनीचे सक्तीने भूसंपादन केले जाणार असून, त्यास जिल्हा समितीने मान्यता दिली आहे. पश्चिम मार्गाच्या भूसंपादनासाठी आतापर्यंत 1021 कोटी रुपये मोबदला वाटप करण्यात आला आहे. (Funds for Pune Ring Road will be made available immediately: Ajit Pawar)
आता जिल्हा प्रशासनाकडून पूर्व मार्गाच्या भूसंपादनाला सुरूवात करण्यात येणार आहे. पूर्व मार्गात 293 हेक्टर क्षेत्राचे भूसंपादन केले जाणार आहे. त्यासाठी 2 हजार 89 कोटी रुपयांच्या निधीची आवश्यकता आहे. 13 पैकी 12 गावांचा मोबदलाही निश्चित करण्यात आला असून, भूसंपादनाची सुरुवात खेड तालुक्यापासून केली जाणार आहे. त्याकरिता खेड तालुक्यातील शेतकर्‍यांना भूसंपादन नोटीस पाठविण्यात आल्या आहेत. या पार्श्वभूमीवर जिल्हाधिकारी डॉ.राजेश देशमुख यांनी निधीची मागणी राज्य शासनाकडे केली आहे. त्यानुसार उपमुख्यमंत्री पवार यांनी तातडीने निधी देण्याची ग्वाही बुधवारी दिली.
बैठकीला सार्वजनिक बांधकाम, वित्त, महसूल, नियोजन, नगरविकास खात्याचे सचिव, उपमुख्यमंत्र्यांचे प्रधान सचिव, जिल्हाधिकारी डॉ. राजेश देशमुख, उपमुख्यमंत्री कार्यालयाचे उपसचिव आदी अधिकारी उपस्थित होते. उपमुख्यमंत्री पवार यांनी पुणे नाशिक हायस्पीड रेल्वे, ‘सारथी’संस्थेचे पुण्यातील मुख्यालय, औंध, नाशिक, कोल्हापूर, नागपूर, अमरावतीतील ‘सारथी’च्या विभागीय उपकेंद्रांचे बांधकाम, पुणे येथील कृषीभवन, शिक्षण आयुक्तालय, कामगार कल्याण भवन, सहकार भवन, नोंदणीभवन, साखर संग्रहालय, इंद्रायणी मेडिसिटी आदी प्रकल्पांच्या प्रगतीचा देखील आढावा घेतला.
