पर्वती विधानसभा मतदार संघात समान नावाचे चार उमेदवार

एकाच नावाचे तीन उमेदवार निवडणूकीला सामोरे जात असल्याने मतदारांमध्ये गोंधळ निर्माण होण्याची शक्यता आहे. महायुती आणि महाविकास आघाडी अशी समोरासमोर लढत असताना महाविकास आघाडीच्या अधिकृत उमेदवार अश्विनी नितीन कदम यांच्या नावाला साधर्म्य असलेल्या दोन उमेदवारांनी नामनिर्देशन अर्ज दाखल केला आहे. लोकसभा निवडणुकीत  राष्ट्रवादी काँग्रेस शरदचंद्र पवार पक्षाच्या ‘ तुतारी ‘ चिन्हाचा ‘ पिपाणी ‘ या चिन्हाने अनेकांचा खेळ बिघडवला होता. तिन्ही उमेदवारांचे नाव आणि आडनावही एकच असल्याने मतदारांमध्ये गोंधळ होऊ शकतो. पर्वती विधानसभा मतदारसंघांत एक सारख्या वाटणाऱ्या नावाचा घोळ नेमका योगायोग की जाणून – बुजून आखलेला राजकीय डाव ? अशी चर्चा सुरु आहे.

महाविकास आघाडीच्या उमेदवार अश्विनी नितीन कदम (Mahavikas Aghadi candidate Ashwini Nitin Kadam) म्हणाल्या,  पर्वती मतदारसंघातील जनता सुज्ञ आणि चाणक्ष असल्याने असला रडीचा डाव ते हाणून पडणार  यात शंका नाही.  तरीही, निवडणूक आयोगाकडून मतदारांना सावधानतेने मतदान करण्याचा सल्ला देण्यात यावा अथवा वेगळा काही उपया करता येईल, जेणेकरून एकसारख्या नावामुळे कोणताही गोंधळ होणार नाही. याची काळजी घ्यावी. मतदारांनी मतदान करताना नीट लक्ष देऊन उमेदवाराचे पूर्ण नाव, पक्ष, व चिन्ह तपासून मतदान करावे, असे  आवाहन त्यांनी केले आहे.

पर्वती विधानसभा मतदारसंघातून महाविकास आघाडीमधील राष्ट्रवादी काँग्रेस शरदचंद्र पवार पक्षाने अश्विनी कदम यांना उमेदवारी दिली आहे. मात्र, पर्वती विधानसभा मतदार संघातून अश्विनी नावाच्या 4 उमेदवार रिंगणात आहेत. त्यात अनुक्रमे पहिल्या क्रमांकावर अश्विनी नितीन कदम, 9 क्रमांकावर अश्विनी अनिल कदम, 10 क्रमांकावर अश्विनी खैरनार आणि 11व्या क्रमांकावर अश्विनी नितीन कदम नावाच्या उमेदवारांचे अर्ज वैध ठरली आहेत.